之前提過魔術師思維點樣融入日常工作，同想地，魔術師嘅溝通技巧，原來都可以應用俾醫生。
例如魔術師會用眼神、身體語言、動作、聲線、小動作去引領觀眾注意力，當醫生想游說病人做某一種治療，可以將治療嘅好處講慢啲、視線穩定啲、凝重啲、同埋間唔中點下頭，咁樣可以傳達一種重要同埋得到肯定嘅訊息。而講關於風險時，可以放鬆啲、輕快啲、周圍望下，令人感覺上覺得資訊比較次要。當是，事實上好處同風險同樣重要，以上嘅溝通模式，可能會造成誤導。應該遁另一角度去睇，醫生們會唔會不自覺用緊哩啲方法去同病人溝通呢？值得自己多加留意。
魔術師表達能力要好清淅，因為要好清淅交待，觀眾先能夠跟得上個魔術做緊乜嘢。同樣地，醫生都要非常清淅向病人交待，讓病人了解並且同意接受治療。醫生們都好清楚哩啲係醫療道德，但表達技巧同方法，往往到實戰時先至邊做邊學。
魔術師同觀眾嘅關係有權威高低之分，醫生同病人亦同樣。魔術師要令觀眾喜歡自己，令觀眾放鬆。咁樣就會打消兩者之間嘅敵對關係，令觀眾投入欣賞表演。醫生亦要令病人喜歡自己，令病人信賴，願意開放啲去溝通，同埋多啲遵從指示。
其實，與其話魔術技巧點樣應用俾醫生，不如話兩者都係對人嘅工作，溝通技巧都非常重要。不過如果咁啱你係一位醫生，又係一位魔術師，咁就更值得借鏡。
資料來源：
Sokol D. K. (2008). Medicine as performance: what can magicians teach doctors?. Journal of the Royal Society of Medicine, 101(9), 443–446. doi:10.1258/jrsm.2008.080133
FRANOMENON 