心理學入面有樣嘢叫自由聯想(Free association)，即係俾一個字你，你即時會諗起啲乜嘢。魔術界嘅術語有時都幾得意，你聽到魔術師講一樣嘢，其實原來代表緊另一樣嘢。以下係幾個同硬幣魔術有關嘅術語，睇下你聽到嘅嘢同魔術師理解嘅嘢有幾唔同？
人名類：
Bobo – 可能你會連繫到一個女仔名，但魔術界嘅Bobo係一個男人，係一個好有代表性嘅硬幣魔術師，更加係一本經典硬幣魔術入門書嘅作者，全名係 J.B. Bobo
Kennedy / Eisenhower / Morgan – 聽落係三個人名，頭兩個更加係兩位前美國總統。對魔術師嚟講，其實係三款常用嘅硬幣。
Han Ping Chien – 聽起嚟似係一個人名，實際上同時係魔術師會做嘅一個動作。
飲品類：
Scotch and Soda – 一般人會認為係一款酒，其實都係一種魔術師用嚟變魔術嘅硬幣。
電影類：
Matrix – 一般人會記起一套經典電影，魔術師會記起一套經典魔術流程。
動詞類：
Talk – 一般人指人與人傾偈，魔術師指硬幣同硬幣傾偈。
Walk – 一般人指行路，魔術師指一種硬幣嘅花式技巧 coin walk。
相反詞類：
Fall – 一般人意會跌落去 (fall down)，魔術師意會跌上去 (fall up)。
Palm – 一般人會攤開手掌向天，魔術師會攤開手掌向地。
單單講硬幣魔術都未講哂，有更多行內術語，但牽涉到魔術嘅秘密，暫且講到哩度。
Photo by Jordan Rowland on Unsplash
FRANOMENON 