劉德華、周杰倫、馮德倫，三個人有乜共通點？除左三個都係男明星，個名有個「德」呀、「倫」呀之外，三個都係多人知道佢哋係鍾意魔術嘅男明星。唔知知唔知，馮德倫早前自拍出過兩隻碟《最好世界變》同《魔術與我》，自拍佢周圍變魔術俾人睇。作為喜歡魔術嘅男明星，佢都算身體力行。
當年外國興起街頭魔術節目，當中有特別嘅拍攝技巧，唔止影住魔術師變魔術，更重點影住觀眾下巴跌哂落嚟嘅反應，俾人一種魔術可以隨街發生嘅感覺。好多魔術道具特別標明係邊個邊個明星魔術師電視變過作為宣傳，掀起一股熱潮。
順帶一提，如果係新手上路，有決心學好魔術，切忌靠明星效應，見到邊個邊個變過好勁嘅就走去學。初學者好容易以為學魔術係一個trick學完到另一個trick 咁學。事實上，學好基本手法，了解背後理論同埋表達方法，更為重要。係就係悶啲，但係學啲咩係唔悶吖？同埋最緊要係三樣嘢 —— 練習！練習！練習！
Photo by Sven Scheuermeier on Unsplash
FRANOMENON 