相傳每個魔術師，都有一個櫃桶放滿買咗無用過嘅道具同魔術用品。以下係一啲小心得，減少買咗但用唔著嘅情況：
1. 學好啲英文，基本上英文係魔術界嘅共同語言。每一個魔術，每一個手法，細緻到用唔同方法去揸住一副啤牌都有唔同嘅名稱。多數嘅教材都係英文書和英文影片。所以學好英文，絕對有助擴闊自己嘅魔術選擇。
2. 睇review。記住係「review」，唔係「reveal」。而家上網咁方便，好多魔術產品都有人做評論。俾啲心機睇下人地點講，例如需唔需要好多事前準備，自己嘅表演埸合是否容許有空間去準備，會否有很多環境限制，產品質素如何等等。啲人review好多時會比較類似產品，咁樣就可以認識到其他選擇。每樣產品總會有人覺得啱用，有人覺得唔啱用。了解多啲其他人嘅評論，再想想是否適合自己。
3. 避免純粹滿足好奇心，哩樣係最難嘅，要好努力去控制自己慾望。畢竟魔術產品貴嘅原因係貴在背後嘅秘密。好多時成本其實好低，或者原理其實好簡單，睇完教學後你會話：「吓？乜原來只係咁咋？」失望之餘只會將佢放入櫃桶底。
4. 搞清楚目標觀眾，好多魔術流程萬變不離其中，有無數方法達至同樣效果。唔少魔術產品其實係魔術師之間嘅競技去改良一個效果，例如你用某個方法去搵隻牌，我可以用另一個完全唔同嘅方法去搵隻牌。但其實對一個普通觀眾來講，佢哋睇到嘅，就係你搵到隻牌。好多時你不斷去買新魔術產品，只你為左想自我感覺良好，而忽略咗一般觀眾嘅真正需要。
5. 堅持買正版。翻版產品質素通常無乜保障。如果肯花時間去了解個產品，細心分析產品評論，控制好自己嘅衝動，基本上都大大減低買咗啲無用嘢嘅風險。再肯付出金錢去購買，就多個原因讓自己去珍惜買返來嘅產品。
FRANOMENON 